स्पंदन

सन १९९९ मध्ये प्रकाशित झालेलं हे माझं तिसरं पुस्तक. सन १९९४ मध्ये प्रकाशित झालेल्या "एका कळीची निगराणी" मध्ये मुले लहान होती. समन्वय ११ तर सनातन ६ वर्षांचा होता. या पुस्तकाने क्रांति केली! असं म्हणतात.

यथावकाश ते पुस्तक out of print झाल्यावर व मुले मोठी होऊन माझ्या अनुभवामध्ये खूप भर पडल्यावर, आधीच्या पुस्तकात भर घालून नवीन पुस्तक करायचे ठरले. या पुस्तकातील समन्वय १६ वर्षांचा व सनातन ११ वर्षांचा आहे. "स्पंदन" हे नाव असंच अचानक सुचलेलं आहे.

या पुस्तकालाही उत्तम प्रतिसाद मिळाला. त्याचे प्रकाशक अचानक गेल्यावर पुस्तकाच्या प्रतींचे चांगले वितरण होऊ शकले नाही. मी अजून तरी वितरक शोधत नाहीये. मला इतक्या वर्षांनंतरही वाचकांची पत्रे येतात, फोन येतात. त्यांनी दिलेला हृद्य प्रतिसाद ऐकून व वाचून हे पुस्तक लिहिल्याचे समाधान वाटते.

या पुस्तकात वर्णन केलेले माझे दीर अण्णा सन २००४ मध्ये गेले. माझ्या पुढची आव्हाने काही कमी झाली, काही वाढली. सध्या मुले अनुक्रमे २७ व २२ वर्षांची मोठी माणसे आहेत. त्यांच्या व्यक्तित्वाचे पदर उलगडताहेत आणि माझ्या शिकण्यामध्ये सतत भर पडतेच आहे. त्याविषयी कधीतरी लिहायला घ्यायचे आहेच!