अध्यात्मरामायणाचे सूक्ष्म सार

अध्यात्मरामायण हा ग्रंथ कलियुगासाठी निर्माण केलेला ग्रंथ आहे. याचा ग्रंथकार अनाम आहे. त्रेतायुगात घडलेल्या रामायणाचा अर्थ कलियुगातील मंदमति अश्रध्द जीवांना सांगण्यासाठी याची रचना झाली. मूळ ग्रंथ संस्कृतात आहे व काव्यमय आहे. तो नित्यपठणासाठी रचलेला आहे.

ग्रंथपूजन, न्यास इ पारायणाला उपयुक्त भागही आहे. प्रत्येक महत्वाच्या भागाच्या पठणाची फलश्रुतीही दिलेली आहे. ही पुस्तिका म्हणजे अध्यात्मरामायणातील तत्वज्ञानाचे गद्य सार आहे. ते मुद्देसूद लिहिलेले आहे. रामायणाची कथा जरी सर्व भाविक भक्तांना माहीत असली तरी त्याचे आध्यात्मिक सार माहीत नसते त्यामुळे बुध्दीभेद होतो व माणूस अश्रध्द व निंदक होतो.  मूळ ग्रंथाच्या वाचनामुळे माझ्या चित्तातला मल गेला व रामप्रभूंविषयीच्या भक्तिला एक वेगळे डोळस बळ आले.